CASTEDDU. Feti 8 comuni de 377 in Sardigna ant cumentzadu a istrinare su bonus de 800 èuros (o sa parte chi tocat, cunforma a sas cumpenzatziones cun sos agiudos natzionales) prevìdidu dae sa lege 12 de su consìgiu regionale, aprovada cun s’impèllida de sa giunta ghiada dae Christian Solinas. Sos tempos de pagamentu depiant èssere de 48 oras. Ma in sos ufìtzios de sos municìpios sunt pesadas paritzas dudas interpretativas. E non sunt istadas bastantes, finas a como, sas respostas a sas Faq (preguntas fitianas) publicadas i su giassu de sa Regione.

S’isbetat una circolare chi diat burrare totu sas dudas. E chi, mescamente, torret imposta a una pregunta de importu: sos fundos andant a sos disocupados o feti a cussos chi lu sunt devènnidos pro neghe de s’epidemia de su coronavirus? Sos ufìtzios comunales sunt isbetende. E si sas crìticas dae banda de s’opositzione s’isbetaiant, carchi duda l’at pesada finas sa majoria. “Totus amus chèrfidu  sa lege 12 e totus semus faghende una figura lègia, opositzione e majoria”, at naradu Emanuele Cera de Forza Italia, chi biet su problema finas comente a sìndigu de Santu Nigola de Arcidanu, “Bi sunt dificultades a beru in s’aplicatzione de sa lege: est coladu unu mese e est ladinu chi non si podet aplicare”.

Diferente est su parre de Pierluigi Saiu, Lega: “Medas sardos sunt timende de non resessire a torrare a cumentzare e nois depimus èssere a tretu de custos sentidos chi sa sotziedade espressat. Sa Regione, at ammentadu, pro sas famìlias at postu 120 milliones e su guvernu 20 milliones e mancari gasi de custu nemos narat nudda”.

I sindaci attendono indicazioni anche sull'indice di contagio