CASTEDDU. Pro more de unu finantziamentu de s’Assessoradu de s’Indùstria, in s’àmbitu de sas atividades de internatzionalizatzione, sa Regione Sardigna at leadu parte a sa de 57 editziones de su Smau de Milano, salone de s’innovatzione, chi ant fatu su 20 e su 21 de su mese de santugaine in sos ispàtzios de Fieramilanocity.

Intre de sas chentu startup annoadoras, chi beniant dae totu Italia, finas bator aziendas sardas chi ant mustradu sos progetos issoro in s’atòbiu milanesu, puntu de referèntzia pro sas impresas chi bolent isvilupare atividades de propònnere in su mercadu de s’innovatzione. Sas startup sardas ant presentadu tecnologias pro torrare a imbentare s’agrucoltura, exposrt e tursimu; pro achirire cumpetèntzia in seguresa de calesisiat genia de ogetu averiguadu in antis in totu su territòriu italianu; pro ismenguare sos consumos e megiorare s’impronta ecològica pro mèdiu de s’anàlisi de sos datos; pro imprentare in 3D dispositivos ortopèdicos.

“Sos progetos de sas bator startup sardas sunt sa testimonia de su livellu de annoamentu chi ant lòmpidu sas impresas de su territòriu regionale”, at marcadu s’assessora regionale de s’Indùstria, Anita Pili. “Una presèntzia de importu pro sa Sardigna, chi mustrat de castiare a inantis cun ispera a su benidore e a sas oportunidades noas pro su sistema produtivu regionale, chi, finas pro mèdiu de s’innovatzione, est cumbintu de barigare custa purrada tosta de crisi cajonada dae s’emergèntzia sanitària. Sa Regione bolet tènnere unu ruolu de giudu, acostagiende e sustenende sas startup isulanas”.